La Bamba
El Vikipedio
Enhavo |
[redakti] Danco
La Bamba estas danco kiu okazas dum junularaj Esperanto-renkontiĝoj. La dancantoj staras brakumante en rondo kaj paŝas dekstren aŭ maldekstren. Aliaj homoj dancas en la mezo kaj "devas" kisi iun tri-foje en la rondo por "liberigi sin". Oni plej ofte dancas ĝin dum la Internacia Seminario kiam oni kelkfoje dancas ĝin dum horo.
Iuj homoj bojkotas la dancon ĉar ili konsideras ĝin malmodesta aŭ timas ricevi malsanojn.
La "bambumado" naskiĝis en aŭgusto 1982 dum la 38-a Internacia Junulara Kongreso en Loveno, kiam (verŝajne dum la Flandra balo la 4-an de aŭgusto) la flandroj demonstris tiun dancon, kiu tiam jam estis tradicia en Belgio.[1][2] La origina danco estis iom pli rafinita: tiu, kiu invitis al kisado, devis subiĝi sur unu genuon, proponante la alian genuon al la invitoto kiel sidilon dum la kisado. Tiu detalo rapide malaperis el la esperantista versio de la danco.
[redakti] Kanto
La Bamba ankaŭ estas kanto akompananta la samnoman dancon. Fakte la danco malbone funkcias sen tiu kanto, kaj praktike neniam okazas sen ĝi. Kutime ĝia ekludado tiom efikas kiel signalo ke homoj spontane ekdancas aŭdinte la unuajn tonojn.
"La Bamba" estas tradicia geedziĝfesta kanto atestita jam en la 17-a jarcento el la meksika regiono de Vera Cruz. Andres Huesca registris ĝin jam en 1908 sub titolo El jarabe Verucruzano ("la verakruca geedziĝo"). Ritchie Valens registris ĝin en 1958, Trini Lopez (en 1966), Dusty Springfield (en 1968), Neil Diamond (en 1969), Raymond van het Groenewoud (kaj patro) Nico Gomez (en 1983 en la filmo Brussels by Night) kaj Los Lobos en la jaro 1986 laŭ tradicia melodio, sed iom post iom oni ankaŭ faris esperantajn versiojn. (Versio troviĝas sur la kompaktdisko "JoMo Friponas!" kaj alia ĉe Feri Floro "Du kolombetoj") La teksto multe varias de unu versio al alia ĉar tradiciaj kantistoj libere kreis proprajn versiojn laŭ la melodio. Sekvas plej konata tekstero.
Teksto :
| Para bailar la bamba Para bailar la bamba se necesita una poca de gracia |
Por danci La bamba, Por danci La Bamba oni bezonas iom da gracio, |
| Bamba, bamba, bamba, bamba Bamba, bamba |
|
| Para bailar la bamba Para bailar la bamba se necesita una poca de gracia |
Por danci La bamba, Por danci La Bamba oni bezonas iom da gracio, |
| Bamba, bamba, bamba, bamba Bamba, bamba |
[redakti] Filmo
La Bamba ankaŭ estas titolo de filmo de Luis Valdez (1987).
[redakti] Fontindikoj
- VANDEN BEMPT, Marc: Kongreso en Belgio : Memorlibro pri la 38a Internacia Junulara Kongreso de TEJO, 1982. Leuven : Esperanto 2000, 1983. 142 paĝoj.
- ↑ Por enkonduki tiun ĉi kutimon onidire sufiĉis nur duona klariga paĝo en la kongreslibro (pĝ. 3 ĉe Vanden Bempt).
- ↑ Mencion pri La Bamba kiel parto de la Flandra balo vidu en pĝ. 78 ĉe Vanden Bempt.
[redakti] Eksteraj ligiloj
- Radio 3ZZZ 2004-05-10 - Ĉi tiu elsendo enhavas la kanton La Bambo!, kantata de JoMo.