龔如心
出自維基百科，自由嘅百科全書
龔如心（1937年9月29號—2007年4月3號）生前係香港最有錢嘅女人，又畀福布斯雜誌評為亞洲頭號女富豪，資產超過 300 億港紙。龔如心響中國上海出世，之後跟阿爸阿媽搬到香港住，最後變咗做香港企業家，後生果陣同埋佢老公王德輝一齊搞華懋集團。由於成日以兩條辮嘅造型露面，因此有「小甜甜」嘅稱號。
目錄 |
[編輯] 娘家
龔如心老竇係龔雲龍，係英國漆廠ICI公司嘅職員，不過就早死，淨返阿媽。二妹係叫龔中心，三弟叫龔仁心，係醫生，四妹龔因心，響華懋做。
[編輯] 生平
龔如心1937年響上海出世，香港瑪利諾修院學校中五畢業。
華懋集團前身嘅華懋公司，就係佢老爺王廷歆1940年代響上海開嘅。因為華懋公司係做塑膠原料、飼料、漂染 、西藥生意，所以王廷歆同龔雲龍兩家上海係有生意來往。而龔如心、王德輝做由細玩到大。
1945年二戰結束，華懋公司搬來香港，而王德輝1947年來香港讀書，而龔如心就1955年中到香港，住響王家。1955年9月29號龔如心十八歲生日，佢就嫁畀王德輝，入佢家公華懋有限公司幫手，1960年兩父子開華懋置業，做地產生意，最後變成家下華懋集團。1967年暴動，兩夫婦就趁平賣入唔少地，發大達。1968年，夫婦不和，大家都有外遇，最後都有和解。王德輝係不育嘅，所以兩夫婦就無仔女。
1970年代華懋係香港數一數二嘅華資地產商。
1983年王德輝畀人綁架，龔如心畀咗 8,580 萬贖金先放人。1990年王德輝又畀人綁架，襲如心畀咗 4.68 億元贖金後，王德輝都係連影都無。龔如心透過攤薄王德輝嘅參明有限公司股份，接管華懋集團主席。1997年獲選美國《福布斯》世界超級富豪榜之中，華人女性排第一。
[編輯] 爭產案
1999年王廷歆入禀高等法院，宣布失蹤多年嘅王德輝死亡，王廷歆同龔如心爭遺產，對簿公堂。2001年翁媳世紀爭產案開審，審咗172日。2002年高等法院裁定龔如心所持1991年遺囑係偽造，王廷歆跟1968年遺囑，係遺產唯一受益人。警方商罪科重拉咗龔如心，話佢偽造文件，不過准佢自簽保釋金500萬蚊。2004年上訴庭駁回龔如心上訴，維持原判。2005年終審庭宣布龔如心上訴得直，係王德輝遺產唯一受益人，幸保逾300億元身家。2006年10月終審庭判龔如心贏訴訟費，估計可獲2.85億元
[編輯] 病死
雖然死因重未公布，不過2006年12月開始傳龔如心患卵巢癌，需接受化療控制病情。2007年4月3日，龔如心最後都病死響養和醫院。